Wararka ka imanaya Degmada Doolow ee Gobolka Gedo ayaa sheegaya in Ciidamada Dowladda Federaalka iyo kuwa Jubbaland ay ku dagaalamayaan degmadaasi.
Wararka ayaa sheegaya in dagaalku uu ka yimid, ka dib markii Ciidamada Dowladda ay la wareegeen amniga degmadaasi.
Wararka ayaa intaasi ku daraya in Ciidanka Jubbaland ee ku sugan Doolow ay ka horyimaadeen in Ciidamada Dowladda ay la wareegaan amniga guud ee degmadaasi, sidaana uu dagaalka ku bilowday.
Dagaalka ayaa degmada ka qarxay xilligii duhurka, iyadoo Ciidamada Dowladda ay gacanta ku hayaan inta badan degmadaasi.
Dadka deegaanka ayaa soo sheegaya in dhinacyada ay dagaalka isku adeegsanayaan hubka noocyadiisa kala duwan, isla-markaana ay ka qayb qaadanayaan gaadiidka dagaalka.
Goobjoogeyaasha ayaa sheegay in dagaalku uu ka socdo bartamaha degmada iyo dhinaca Garoonka Diyaaradaha Doolow.
Dagaalka ayaa hakad ku keenay isu socodkii dadka iyo gaadiidka, waxaana xiran goobaha ganacsiga ee magaalada.
Dagaalkan ayaa qalqal amni ka abuuray Degmada Doolow oo dhacda xuduudda ay Somaliya Gobolka Gedo kala wadaagto Itoobiya.
Dagaalka ayaa imanaya, xilli Dowladda Federaalka iyo Maamulka Jubbaland ay maalmihii la soo dhaafay dhaqdhaqaaqyo iska soo horjeeda ay ka wadeen gobolkaasi, waxaana gobolka ku wada sugan masuuliyiin ka kala socda labada dhinac.
Dowladda Federaalka iyo Dowlad Goboleedka Jubbaland ayuu khilaaf soo kala dhexgalay bishii October, ka dib markii Madaxweynaha Jubbaland lagu eedeeyay in uu ka horyimid qorshaha ay Dowladda Federaalka dalka ku gaarsiineyso doorasho qof iyo cod ah.
Khilaafka labada dhinac ayaa cirka isku shareeray bishii xigtay ee November, markaas oo Jubbaland ay sheegtay inay aadeyso doorasho dadban, oo lagu soo doortay Baarlamaanka iyo Madaxtooyada.
Villa Somalia ayaa si adag uga hortimid dib u doorashadii Axmed Madoobe, kaas oo Xildhibaanada Baarlamaanka ay 25-kii November ay mar saddexaad u doorteen inuu noqdo Madaxweynaha Jubbaland.
